Yaponiyada 18 maydoncha, 15.48 MWh: energiya tarmoqqa 24 soat sotiladi

Yaponiya, Miyazaki (Kyusyu). Mamlakatning eng quyoshli hududlaridan birida 18 ta maydonchadan iborat, tarmoqqa ulangan PV + saqlash loyihasi ishga tushirildi. Jami sig'im — 15.48 MWh. Tizim FIT (belgilangan tarif) sxemasi bo'yicha sutkasiga 24 soat tarmoqqa energiya sotadi.

Konfiguratsiya

Loyiha bitta katta maydoncha emas, 18 ta bir xil obyektdan yig'ilgan. Har bir maydonchada:

• 49.5 kW / 860 kWh saqlash tizimi
• Tiger Neo quyosh panellari — 289.8 kW
• DC-coupled PCS va alohida DC-DC shkaf
• 4 ta SunGiga 215 kWh DC bloki

Jami: 72 ta batareya bloki, 18 ta maydoncha, 15.48 MWh.

Suyuqlik bilan sovutish va aerozol yong'in himoyasi Yaponiyaning yong'in xavfsizligi qonuni (Fire Services Law) talablariga to'liq muvofiq. Barcha 18 ta maydoncha Jinko ESS bulutli platformasi orqali real vaqtda kuzatiladi.

Nega aynan Yaponiya keysi qiziq

Yaponiya energiya saqlash bo'yicha dunyodagi eng qattiq tartibga solinadigan bozorlardan biri. Yong'in xavfsizligi, sertifikatlash va tarmoqqa ulanish talablari alohida-alohida hujjatlashtiriladi va ularning har biri majburiy.

Shu sababli e'londa keltirilgan "Yaponiyada ishlasa, hamma joyda ishlaydi" degan fikr marketing shiori bo'lishdan tashqari amaliy ma'noga ham ega: qat'iy tartibli bozorda topshirilgan tizim boshqa bozorda savol tug'dirmaydi.

O'zbekiston uchun ikkita xulosa

Birinchisi — taqsimlangan arxitektura. 15.48 MWh ni bitta joyga to'plash o'rniga 18 ta maydonchaga bo'lish yechimi e'tiborga loyiq. Har bir maydoncha mustaqil ishlaydi, ammo boshqaruv bitta platformadan olib boriladi.

O'zbekistonda bu model quyidagi holatlarda ma'noga ega: tarmoqning turli nuqtalarida ulanish quvvati cheklangan bo'lsa, yer maydoni bo'lingan bo'lsa yoki loyiha bosqichma-bosqich moliyalashtirilsa. Bitta yirik obyekt qurish har doim ham eng arzon yo'l emas.

Ikkinchisi — FIT modeli. Bu yerda batareya obyektning o'z iste'moli uchun emas, energiyani tarmoqqa sotish uchun ishlaydi. Kunduzi quyoshdan ortiqcha energiya saqlanadi, kechqurun va kechasi tarmoqqa beriladi.

O'zbekistonda bunday sxema uchun tegishli tarif mexanizmi hozircha shakllanmagan. Ammo tarmoq miqyosidagi saqlash loyihalari soni ortib borar ekan, bu savol muqarrar ravishda kun tartibiga chiqadi. Yaponiya keysi shu modelning texnik jihatdan qanday ko'rinishini ko'rsatadi.

Bitta muhim eslatma

Loyihada SunGiga 215 modeli ishlatilgan. Bu model bugungi kunda ishlab chiqarish dasturidan chiqarilgan — zavod 215 bo'yicha yangi buyurtmalarni qabul qilmaydi.

Ya'ni bu material referens sifatida o'qilishi kerak: u arxitektura va ishlash modelini ko'rsatadi, bugun buyurtma qilish mumkin bo'lgan mahsulotni emas. Joriy C&I liniyasi — SunGiga G2 (261 kWh) va G2 Plus (522 kWh).

---

Oshkoralik uchun: ushbu yangilik muallifi Jinko ESS kompaniyasida Markaziy Osiyo bo'yicha ishlaydi. Material ochiq manbadagi e'lon asosida tayyorlangan va biror uskunani tavsiya qilish maqsadini ko'zlamaydi.

**Manba: **Jinko ESS MEA & CA — LinkedIn · foto: Jinko ESS MEA & CA