50 yillik dizel distribyutori energiya saqlash tizimlariga o'tdi: Jubaili Bros va Jinko ESS shartnomasi

2026-yil iyun. Yaqin Sharq va Afrikadagi yirik quvvat yechimlari yetkazib beruvchisi Jubaili Bros Jinko ESS bilan distributorlik shartnomasini imzoladi. Kompaniya GCC mamlakatlari, Suriya va Nigeriya bo'yicha Jinko ESS ning rasmiy ESS kanal hamkori maqomini oldi.

Shartnoma haqida Jubaili Bros ning guruh bo'yicha ta'minot menejeri Hadi Mroue e'lon qildi.

Nega bu oddiy distributorlik shartnomasi emas

Jubaili Bros — energiya saqlash bozoriga yangi kirgan kompaniya emas. U qariyb 50 yil davomida dizel generatorlar yetkazib bergan: kasalxonalar, zavodlar va tarmoq uzilishlari bilan yashaydigan biznes uchun.

Kompaniyaning o'z e'lonida asosiy fikr shunday ifodalangan: bu dizelni almashtirish haqida emas, uni kuchaytirish haqida.

Ya'ni sxema quyidagicha: obyektda yillar davomida ishlab kelgan o'sha dizel generator qoladi, lekin uning yoniga batareyali saqlash tizimi va quyosh panellari qo'yiladi. Kunduzi quyosh energiyasi to'planadi, kechqurun beriladi, dizel esa faqat haqiqatan zarur bo'lgandagina ishga tushadi.

Kompaniya bundan kelib chiqadigan uchta natijani sanaydi:

• energiyaning tannarxi (COE) pasayadi;
• loyihaning to'liq joriy qiymati (NPC) pasayadi;
• yoqilg'idan tejaladigan mablag' biznesning o'ziga qaytadi.

C&I (tijorat va sanoat) mijozlari uchun bu, e'londa aytilishicha, "yetishmayotgan bo'lak": u alohida turgan quyosh tizimini boshqariladigan quvvatga, faqat dizelda ishlaydigan obyektni esa gibrid obyektga aylantiradi.

Jubaili Bros delegatsiyasi Jinko ESS ofisida.

Kontekst

Jubaili Bros — mintaqada bir nechta brend bilan ishlaydigan distributor: kompaniya, masalan, Livanda BYD Energy Storage ning sertifikatlangan distributori sifatida ham e'lon qilingan. Bu distribyutorlik bozori uchun odatiy holat — kanal hamkori odatda bitta emas, bir nechta ishlab chiqaruvchining mahsulot portfelini olib boradi.

O'zbekiston uchun nima ahamiyati bor

Bu yangilikning qiymati uskunada emas, biznes modelining o'zgarishida.

O'zbekistonda ham generator, nasos, kompressor va sanoat uskunalari bo'yicha o'nlab distributor kompaniya ishlaydi. Ularning mijoz bazasi — aynan energiya saqlash kerak bo'ladigan korxonalar: zavodlar, sovutgichli omborlar, qayta ishlash korxonalari. Ular bu mijozlarni yillar davomida biladi, servis tarmog'i va texnik xodimi bor.

Jubaili Bros misoli ko'rsatadigan narsa shu: dizel distribyutori uchun saqlash tizimiga o'tish — yangi bozorga kirish emas, mavjud mijozga yangi mahsulot taklif qilish. Bu esa ancha arzon yo'l.

Shu bilan birga, o'xshashlik cheklangan. GCC va Nigeriyada dizel — asosiy manba; O'zbekistonda u zaxira. Shuning uchun bu yerda hisob yoqilg'i tejashga emas, kechki cho'qqi yuklamani kamaytirish va ishlab chiqarish uzluksizligiga quriladi.

---

Oshkoralik uchun: ushbu yangilik muallifi Jinko ESS kompaniyasida Markaziy Osiyo bo'yicha ishlaydi. Material ochiq manbadagi e'lonlar asosida tayyorlangan va biror uskuna yoki distributorni tavsiya qilish maqsadini ko'zlamaydi.

**Manba: **Hadi Mroue, Jubaili Bros — LinkedIn · Jubaili Bros rasmiy sahifasi, 2026-yil iyun · fotolar: Jubaili Bros / Jinko ESS MEA & CA